Қызылорда облыстық телеарнасының 1991-2024 жырдардағы даму тарихы

Аңдатпа

Андатпа. Мақалада Қызылорда облыстық телеарнасының 1991-2024 жылдардағы даму тарихы жайлы баяндалған. Арал өңіріндегі тұңғыш телеарна егемендіктің алғашқы жылдары дүниеге келді. Осы тұрғыдан алғанда 1991 жылдың 30 сәуірінде өз қызметін бастаған облыстық телеарнаның қалыптасуының тарихи тәжірибелерін зерттеудің маңызы зор. Сондықтан облыстық телеарнаның құрылу кезеңдері, кадрлық-шығармашылық әлеуеті мен  бағдарламалық  ерекшеліктеріне талдаулық зерттеулер жүргізу отандық тарихшылар үшін өзекті. Қызылорда телеарнасының егемендіктің рухани және саяси негіздерін нығайту үшін жасаған қызметін зерттеу арқылы аймақтың қоғамдық-саяси және экономикалық дамуын бағамдау да өзекті мәселе болып табылады.

Зерттеудің мақсаты – Қызылорда облыстық телеарнасының 1991 жылдан бүгінгі күнге дейінгі дамуының тарихи кезеңдерін жүйелеу және талдау болып табылады. Осы мақсатта телеарнаның даму кезеңдерін, материалдық-техникалық және кадрлар әлеуетінің нығаюын, оның өңірдің саяси - экономикалық дамуын насихаттаудағы қызметтерін көрсету міндеттері қойылды.

Зерттеу Қызылорда облыстық телеарнасының тарихын мұрағат деректері мен мерзімдік баспасөз мәліметтерін, мамандар естеліктерін жүйелеу және талдау негізінде жүргізілді. Зерттеу әдістемесі объективтілік, тарихилық, жүйелілік, салыстырмалы тарихи әдістерге негізделген. Қызылорда облыстық телеарнасының 1991-2024 жылдар аралығындағы қалыптасуы мен даму тарихы баспасөз материалдары мен тиісті әдебиеттер мен құжаттар негізінде алғаш рет жүйеленді.  Қазіргі кезде Қызылорда облыстық телеарнасы тарихын арнайы  зерттеген бірде-бір ғылыми жұмыс жоқ. Зерттеуде жарияланған деректердің көпшілігі ғылыми айналымға алғаш рет енгізілді.